SCRITTI NOVI
L'ORTU NATU
Mi sò nati l'idei
In tanti li silenzii
I vosci eppo' li mei
L'impinsati partenzi
In sta vita chì fù
Dura ma chì fù ricca
In st'à pena di più
Ch'ùn si dumanda micca
In lu sudori chì
V'avvinghji ugni surrisu
Hè più bellu cusì
U meiu u paradisu
In sta forza cusì
Di tinnarezza ciatta
Sapendu bè chì quì
L'amori ci si piatta
In lu visu chì sà
Firmà spantu eppo' degnu
Ancu in lu dubbità
D'ugni ghjornu l'impegnu
In lu sudori chì
V'avvinghji ugni surrisu
Hè più bellu cusì
U meiu u paradisu
In lu pinseri natu
Da li pochi larghini
È prestu sminticatu
Par ùn firmà mischini
In lu rigretu ancu
Di ciò chì nun s'hè fattu
È lu spirà à fiancu
In lu stessu ortu natu
In lu sudori chì
V'avvinghji ugni surrisu
Hè più bellu cusì
U meiu u paradisu
( C.L )
( In u ricordu fidu di Babbu è Mamma... )
ALÌ
Aghju l'anima nera
È lu punghju chì sà
Facciu à me manera
È mingu par campà
Cambiu casata è nomu
Ghjustu par ramintà
Ch'e' voddu campà omu
È schjavu ùn voddu stà
Saltu, volu, è pizzicu
Mingu par fà cascà
U meiu u numicu
U devu supranà
Chì lu me punghju mughja
È la so rabbia dà
À issa peddi più bughja
Issa poca dignità
Africa Terra Nera
D'un vechju arradicà
Mingu à me manera
Ghjustu par vindicà
I toi li fiddoli
Oghji nati culà
Capighjimbi eppo' soli
Privi di libartà
In issa tarra chì credi
Schjarì l'umanità
Muchendu li a peddi
Troppu nera sarà ?
Aghju l'anima nera
A voddu fà sapè
L'avvena m'addispera
È mingu à più pudè...
Ci ni volsi curaghju
Par campà neru quì
Ci ni volsi curaghju
Ma oghji sò ALÌ
L'anima nera l'aghju
È voddu campà quì
L'anima nera l'aghju
Oghji mi chjamu ALÌ !
( C.L )
( Mohamed Alì, natu u 17 di Ghjinnaghju di u 1942. Hà cambiatu nomu è casata - Cassius Marcellus Clay, à l'urigina - par ùn purtà un nomu di schjavu. Si hè oppostu à a guerra di u Viet-Nam. Elettu spurtivu di u XXu seculu da un'accolta internaziunali di ghjurnalisti. U 17 di Dicembri di u 2005, hà ricivutu in Berlinu a midadda di a Paci "Otto Hahn". )
IN SONNIU
Ti vurria cuntà stonde d'à mezu i celi
Duve per sunnià ci firmemu zitelli
Ti ne vurria dà allegrie spartute
Duve lu mare sà le nostre voglie tutte
Ti ne vurria dì porti o citadelle
Da cunfinà per tè l'isule eppo' le stelle
Ti ne vurria arrimbà surrisi à li venti
Chì per tè si facenu strada eppo' sumenti
Ti ne vurria sventulà tante bandere
Quelle ch'in lu to core e s'anu le so terre
Ti ne vurria dà risposte senza chjame
Ti vurria sfiatà in quelle meie brame
Ti ne vurria fà ghjorni per li sicreti
Chì ci nascenu in mente quant'è case è tetti
Infini rigalà ti u tempu chì ritene
L'assai chì ci manca, u pocu chì ci vene
( C. L )
6. Ceccè / Novi Le 06/05/2010 à 15:46
5. Ghjuvanu Le 06/05/2010 à 15:36
2. solinas Micheli Le 03/10/2009 à 20:50
1. Corsu Sempre Le 02/09/2009 à 22:38