IN POCHI PAROLLI...
CULTURA ?
Le 24/02/2010 à 17:11Commentaires (0)Ajouter un commentaireVi salutu...
Mi ni scusu, ma u titulu vi pudaria sbaglià... Ùn voddu parlà francamenti di cultura, ma di una stragi successa pochi ghjorna fà... A morti viulenti d'un zitiddonu... Avia vint'anni, o à pena di più... Ùn ghjudicaraghju à nimu, chì ghjudici ùn sò !... È ci tocca, à tutti, à rispittà a pena è u dulori di i famiddi...
Purtaraghju ghjustu un ochji dillusu à a noscia sucità, à a noscia Corsica.
Dopu à issa stragi sò stati spiicati, una volta di più, i causi è caghjoni d'issi pessimi mumenti : una ghjuventù chì ùn cunnosci a so strada, valori persi, bienda à più pudè.... È trà mezu à issi discursati, a scimità tamanta, quidda chì pratendi chì, par disgrazia, l'armi - à focu - sò culturali in Corsica !!!
Eccu la spiicata a radica maestra di i guai nosci ! A noscia cultura di l'armi ! A cultura di l'armi in Corsica ! Ed hè par quissa chì no' ùn ci ni pudemu sbarazzà : hè culturali !
Allora mi scusareti di dì la, ma eiu, s'eiu cunnoscu l'usu di l'armi in a noscia curcia sucità, ùn li ricunnoscu u statutu di fattu culturali !
In prima parchì, s'iddu si salta trè secula in daretu in Corsica, ùn socu micca sicuru chì tuttu u mondu, o a maior'parti - dunqua ciò chì difinisci una cultura in tantu chè "usu d'una sucità" - avissi avutu i meza di cumprà si fucila è pistoli ! Dighjà chì c'era à chì fà à manghjà si un bucconu...
Eppo' supr'à tuttu, una cultura pò è devi cambià, è ciò chì ùn cunveni si pò lacà par istrada, par acquistà un novu chì cunveni à a piazza : eccu ciò ch'idd'hè, par mè, l'andatura di una cultura viva !!!
È dinò, vi vurria dì un altru affari : sè a spiicazioni hè "culturali", è s'idd'hè difficiuli di lascià ciò chì hè "culturali", comu sarà tandu chì u "suchju" di a noscia cultura, a noscia lingua, a lachemu andà di mali, a ci lachemu mora senza varuna difficultà ?
A legi pruibisci l'armi, ma ancu contru à a legi, i tinimu chì hè a noscia cultura.
È a lingua, ancu quandì a legi ci aiuta - un pocu, è ancu troppu pocu, hè vera ! - a lachemu mora ?
Curciu Populu Corsu, saria ora chì tù trovi una strada altra chè quidda di u cimiteriu !
U FRATIDDONU...
Le 22/01/2010 à 21:45Commentaires (0)Ajouter un commentaire"vous avez reçu un avertissement vous informant que vous approchiez la limite en matière de demande d'ajout à une liste d'amis, cela signifie que nous avons déterminé que vous ajoutiez de nouveaux amis trop rapidement... L'utilisation abusive de ces fonctions peut entraîner la désactivation permanente de votre compte."
Eccu u picculu missaghju ch'idda mi lasciò a "reti suciali" quand' e' circaia d'aghjunghja unipochi di cunniscenzi à u listinu di "l'amichi" custruitu cù pacenzia à nantu à u santissimu "Facebook".
Dicini "a prima di i reti suciali" : ma comu avaremu fattu sinu à oghji à campà senza ? L'affari si hè stallatu è bè in i nosci viti, è hà presu piazza è forza... È com'è à tutti, ci hè toccu à apra a noscia pagina...
Era dunqua in traccia d'invià i me invitazioni à sparta l'amicizia quand'iddu m'affaccò issu scrittu. Scrittu, in parti, in russu. Bomba ! Mi ni ghjunsi a paura di rumpa issu beddu ghjuculeddu, è mi firmai tandu un mumentu di mandà i me dumandi. Po' a me stizza naturali presi a suprana, è mi dicisi à publicà l'infurmazioni à nantu à u "muru", d'issa manera :
Quand le "réseau social" empêche de "socialiser" : "... vous avez reçu un avertissement vous informant que vous approchiez la limite en matière de demande d'ajout à une liste d'amis, cela signifie que nous avons déterminé que vous ajoutiez de nouveaux amis trop rapidement... L'utilisation abusive de ces fonctions peut entraîner la désactivation permanente de votre compte." Vous avez dit liberté d'expression ?
Com'è vo' a vi dubbiteti, ci hè stata una parsona chì m'hà signalatu chì "l'affari li piacia" !
È tandu missi eiu issu cumentu :
... Donc, en clair la "boîte à se faire des amis" est en fait "la boîte à se faire des amis mais pas trop quand même, on sait jamais... Néo pourrait prendre le contrôle de la Matrice ! ".
Euh... Au-delà de la blague, il y a sûrement un peu de ça, non ?È a sapeti ? À pena publicati issi biglittina ( 2 minuti dopu, par essa pricisu ! ), l'affari viaghjaia dinò...
Ci sapiami sutt'à l'ochja di i spii, ma quali l'avaria pinsata chì l'ochja erani sempri aparti, in cuntinivu, è pò ancu essa fendu a spia à tutti... à tempu !
"Big brother", u "Fratiddonu", ci guata, à tutti... Sempri... In ugni locu...
DI CORI È D'ANIMA, DI MUSICA È DI LINGUA
Le 24/12/2009 à 13:22Commentaires (0)Ajouter un commentaireEccu... Natali s'avvicina, è l'annata hè par finiscia... Un'annata ricca par no', malgradu unipochi di cambiamenti chì, senza amuffà à nimu, ci ani fattu prò...
Un'annata di pocu, mi diciareti. Hè vera chì semu stati un pocu muti, ma spiremu ch'iddu sarà par ripiddà meddu u nosciu fiatu par i mesi à vena. Un fiatu novu chì ci avviarà, spiremu la puri, versu scelti musicali sempri di più in cunfurmità cù a noscia estetica.
U tempu vi pudaria parè longu, prima di senta ci, ma ci tocca à dà un'altra vistura à i nosci canti, da porghja vi li sempri più vivi.
Supr'à tuttu, vulariami à fiancu à tant'altri muscià vi, postu chì nudda ùn hè ancu assicuratu à issu liveddu, chì a noscia lingua pò dì tuttu è di tutti i maneri.
Iè, ben'intesu, si pò parlà di a Corsica in ugni lingua. Ma ghjuvarà sempri di parlà di sè ? Par contu nosciu, l'idea vera saria di parlà d'ugni cosa in Lingua Corsa, fora parchì micca, ma supr'à tuttu quì...
Dici a canzona "una lingua di quì in bocca à tuttu u mondu" : l'affari ùn hè ancu fattu, par disgrazia, è i piricula di veda la rinculà sò sempri d'attualità, malgradu l'accunsenti, i nustalgii, i tituli d'articuli, i noma di magazena o quiddi di i ziteddi, i trè parolli esotichi suminati quinci o culandi par fà bè...
Vulè ni di più pà a so lingua, sarà intullarenza ? Sarà arcaisimu ?
Ùn hè un ghjuveddu a noscia lingua, ùn hè un tisoru. Ùn hà valori micca, à senta dì, in lu mondu di l'affari, di a cumunicazioni, di i rilazioni internaziunali.
È pudaria ancu essa vera... Ma ùn ci basta, à no', ch'idda sighi a noscia anima ?
A noscia, a battaglia, sarà d'ùn perda la... Hè una battaglia di u cori. Avali.
Hè dinò una battaglia di a raghjoni.
Bon' Natali ! È Paci è Saluta à tutti pà l'Annu Novu !
NOVI, A STORIA...
Le 29/11/2009 à 14:41Commentaires (0)Ajouter un commentaireUn salutu à vo' !
Un picculu ramentu, à quiddi chì ùn a cunnisciariani, di a noscia storia.
Dicembri di u 2005 : Partini da Canta u Populu Corsu Alain Abad, Bernard Ferrari, Grégory Gambarelli, Ceccè Lanfranchi , Jean-Charles Papi, Laurent Perez, Bruno Vidal.
À i primi ghjorna di u 2006, hè fundatu trà quissi l'associu NOVI.
S'urganizighja pianamenti è bè un gruppu, ben chì Bernardu Ferrari è Larenzu Perez ùn participessini tantu à a dimarchja.
D'austu di u 2006, esci u primu dischettu di u gruppu, un 3 tituli chjamatu "N9VI", è publicatu ind'è AGFB.
À l'occasioni d'iss'arrighjistramentu, s'aghjunghjini à l'effettivu di u gruppu Stephane Mangiantini, una di i voci di i Muvrini, è Sebastien Bonifay à a bassa.
Dopu à qualchì tempu, Alain Abad lascia u gruppu è hè rimpiazzatu da Francescu Sabiani. Hè cù issu novu è talintosu ghitaristu arrighjistra in u 2007 u so dischettu "U Portaluci", sempri ind'è AGFB.
U ghjiru di l'istati 2008 vidi affaccà à nantu à a scena pà a prima volta un ghitaristu è cantadori di prima trinca, Laurent Leandri, mentri chì Stéphane Mangiantini, impignatu è bè cù i Muvrini, si faci più raru à fiancu à NOVI.
U gruppu si faci un pocu silinziosu dopu à issu ghjiru, è a so prima affaccata scenica di maghju di u 2009, à l'Aghja in Aiacciu, prisenta à u publicu un novu musicanti : Christophe Vellutini sona ( è comu... ! ) di bassa oramai, rimpiazzendu cusì à Sebastien Bonifay.
U 6 d'Austu di u 2009, dopu à l'unicu cuncertu di l'istati in Livia, Jean-Charles Papi è Grégory Gambarelli annunciani, insemi, a so partenza.
Da tandu, NOVI si cumponi unicamenti di Ceccè Lanfranchi, Laurent Leandri, Francescu Sabiani, Christophe Vellutini, Bruno Vidal... L'associu si hè ristrutturatu iss'ultimi ghjorna. È circa à avvià a so strada tinindu sempri à menti chì, in fatti di musica, com'idda l'avia in tempi d'una volta J-C. Papi : "on ne s'interdit plus rien" !
Vi salutemu à tutti...
SI N'IMPARA TUTTI I GHJORNA
Le 28/11/2009 à 22:48Commentaires (0)Ajouter un commentaireVi salutu !
L'avareti rimarcata chì, issi pochi tempa, si vidini parichji affari mintuvati à nantu à u "Libru d'Oru". Duventa à veru, issu libru, una pagina culturali à nantu à u situ. S'impara di tuttu, è si vidi cù furtuna u comicu chjachjarà cù u filusoffu...
Hè vera dinò ch'iddu ci hè un pocu di stizza, ugnitantu... Ma, riflittindu ci, tantu meddu s'idda passa cù i parolli : a ferta d'una parolla hè più piriculosa pà l'orgogliu chè pà a carri, anc'assà ! Eppo', l'avia ditta dighjà, chì tuttu si pudia dì quì, firmendu si, ben'intesa, in i limiti chì i reguli di u galateu c'imponini...
Andendu più in dà, mi rendu contu chì u "Libru d'Oru" hà à pena sviatu : a ghjenti si ni ghjova com'è d'un foru. Soca ch'iddu ni manca unu, è à veru mi piaciaria à metta ni unu in istrada, cù tema varii à dibatta, ma... aspettu pà iss'affari d'essa sicuru di dispona d'una "mudarazioni capu nanzi", par lacà i sputriti à a porta di u situ !
L'avareti capita, par quissi, piazza ùn ci ni sarà mai...
Allora, in tantu d'avè un "Foru di Discussioni" chì ci posca permetta di parlà di tuttu, vi precu di cuntinuvà à lacà i vosci missaghja, cacciati è citazioni à nantu à u "Libru d'Oru", chì cinsura ùn ci ni sarà... sè vo' sapeti firmà curtesi !
Cù piaceri, vi salutu...
TRADUZZIONI
Le 10/11/2009 à 06:57Commentaires (0)Ajouter un commentaireUn salutu...
Ugnitantu, quand'iddu mi veni à menti di rinuvà un pocu a vistura di u situ, mi facciu un picculu ghjiru à nantu à l'arnesu tecnicu par veda s'iddu mi pruponi qualcosa chì pudaria cambià u visu di http://www.novi-corsica.com.
È issa volta, una pruposta ci hè : un traduttori plurilinguisticu ! Chì affaronu... Pudè tuccà u nosciu publicu d'Auropa è di u Mondu in a so lingua, pinseti ! Quantu ni ricivimu, lagnanzi d'amichi frusteri chì vurriani avè "novi di Novi" in lingua soia !
Cuccagna ! Avali, eccu chì a pussibilità asisti. Dopu à parichji provi è fiasca par fà viaghjà l'affari - i famosi bugs ! - a l'avia fattà a stallà a mecanica in a prima pagina di u situ ! O li festi è trullalleri in casa : à Brunu, Francescu, Larenzu, Cristofanu è mè, ci paria un mondu, un mari francatu versu un successu sempri più maiori !
Ahù ! M'era scurdatu eiu di u principali : scrivu in corsu, lingua capita pocu è micca da i traduttori automatichi pruposti quinci o culandi... Ùn asisti u corsu pà issi loca... Nemmancu in i ghjoculi videò... Mancu stampa à nantu à i cnali zittidaghji di dissegni animati... È cusì cusì pocu à nantu à « Faccia Beccu » ( M'aveti capitu, innò ? )...
Dunqua, è par issu pocu, traduzzioni da u corsu à l'inglesu ( o altru ) ùn ci ni sarà... ( Fora di qualchì missaghju di u libru d'oru lampatu in francesu, è fora, pò ancu essa, in u sensu inglesu / francesu, di u nosciu famosissimu Show my way in a canzona Ella )...
Ma chì piccatu, à veru, pà u nosciu publicu scatinatu di l'Al di Corsica... Eh, chì vuleti, l'avemu ancu no' a « Beatlemanià »... No', a chjamemu a « Novimanià ».... Alò alò, chì tarroccu !
Vi salutu, è incù piaceri !
STATISTICHI
Le 06/11/2009 à 12:39Commentaires (1)Ajouter un commentaireUn salutu à vo' !
Di regula, ùn mi garba tantu, ma mi veni oghji in idea di parlà à pena di sciffri.
L'arnesu tecnicu chì porta u nosciu situ ci permetti d'avè un ochji pricisu à i nosci visiti, in ciò chì tocca à u modu di cunnizzioni di l'internauti ( è sentu da quì unipochi di voci puritano-puristi : è comu si dici in corsu « connection », « internaute » ? U corsu hè una lingua magica, chì hà invintatu una parolla unica par risponda à tutti issi quistioni, è tantu meddu par mè chì dizziunariu ùn socu. Issa parolla di cinqui lettari... Aiò, basta, tarroccu ! ).
Di manera chjara è pricisa, dicia, sapemu qualissi sò l'indirizzi ( URL ) o i parolli scelti par ghjunghja à nantu à u nosciu situ.
A vi cuncedu, ci hè una « spia tecnica », di manera curtesa si chjama « arnesu di mudarazioni », chì ci permetti di sapè parichji affari à nantu à l'urighjina di i visiti... Hmm... Aiò, firmeti puri tranquilli, l'identità, ùn avemu u drittu d'avè la, ùn si pò sapè !
Fora di tutti issi cunsidarazioni, ci voli à ricunnoscia chì tutti issi sciffri, u so sensu, u poni ancu avè.
Fighjuleti : iss'ultimi trenta ghjorna, in ciò chì tocca à l'indirizzi scelti par vena ind'è no', a più sparta, fora di "google" ( 342 visiti ), hè stata « www.novi-corsica.com"( 107 ), ciò chì ci porta à pinsà chì, dopu à un mumentu di « missa in sonnu » di u situ, a so rimissa in opara viaghja piuttostu bè, l'indirizzu direttu issendu u più cunnisciutu.
In siconda pusizioni, si trovani l'indirizzi « doomby.com » è « e-monsite.com » ( 17 ), chì sò i virsioni inglesa è francesa di u nosciu « ospitu ». Ci hè dinò una logica, chivi. Veni in terzu l'indirizzu « Google.de », segnu di l'intaressu cuntinivu di l'Alimani pà a musica corsa, chì hè sicura, quissi ani visitatu d'altri porti cursini chè i nosci. Ind'è no' funi 14.
U « libru di i facci » ci hà purtatu 12 visiti : ben'intesa, vi parlu di Facebook. Malgradu i gruppi, grupponi, gruppini è gruppetti, trà i quali « quiddu di quiddi chì ùn sani qual'iddi sò quiddi chì cunnoscini à quiddi chì a sani », a « reti suciali », « facebook.com », ùn ci hà porsu tantu sucialisazioni !
In daretu, è in l'ordini, t'avemu à : "corsicacd.com" ( 9 ), "alta-frequenza.com" ( 5 ), "bing.com" ( 4 ), "sunemu.com" ( 3 ), "whois.domaintools.com" ( 3 ), "terracorsa.info" ( 2 ), "altagna.net" ( 2 ).
Eccu par quiddi chì sò vinuti à veda ci à parta si da un indirizzu pricisu.
Un ochji avali à quiddi chì sò ghjunti ind'è no' senza l'indirizzu, pichjendu par furtuna qualchì parolla par truvà ci.
568 sò vinuti pichjendu « novi.e-monsite », in sumidda à ciò chì si hè vistu da supra. 29 ani pichjatu « N9VI », 14 « groupe corse novi » ( sarani frusteri, chì ni pinseti ? ), 11 simpliciamenti « novi ».
« Novi groupe », ani pichjatu 10 altri, è 5 dinò « novi corse », soca par sfrancà si da i risichi di l'omonimia. 5 altri ani sciaccatu « groupe novi » : à quissi li piacini i cosi simplici è asatti.
Pà u restu, t'avemu à : « novi-corsica » 4 volti, 3 « novi groupe corse », « www.ovi.com" 3 volti ( hè vera, a vi ghjurgu ! ), 3 « novi corsica » è 3 « nôvi » ( Circheti vo' u sensu di l'aletta à cappeddu... ).
Dunqua, ni sariami à più di 650 « internauti » chì sò vinuti quì circhendu à parta si di Novi. Saria quissu u segnu chì l'identità di u gruppu cumencia à fà si piazza in a menti ( è forsa in u cori ) di l'internauti ? A vulemu spirà.
À fiancu à quissi, 77 parsoni sò ghjunti ind'è no' pichjendu « Ghjuvan' Carlu Papi », è 9 pichjendu « Sintinnedi » ( Iè, cù u sbagliu d'ortograffia ! ). Di quissi, si pò pinsà chì unipochi circaiani à no', ma chì tanti altri vuliani simpliciamenti veda à « Ghjuvan'Carlu Papi », o senta à « Sintineddi »...
Infini chì, una volta spulpati issi sciffri, mi socu impiutu un altru biglittinu è mi socu resu contu chì Novi t'hà a so propia identità à nantu à a reti. È, a vulemu creda è spirà, in cori à vo' tutti chì ci lighjiti o steti à senta !
Cù piaceri, vi salutu...
ABRAHAM LINCOLN
Le 25/10/2009 à 07:46Commentaires (0)Ajouter un commentaireEccu mi dinò... Ghjustu par dì à a ghjenti chì avvinghji issu situ chì no' travaddemu à veru, ancu sè, curiosamenti, ùn ci hè ancu nudda di musicali à nantu à issu situ cunsacratu à u cantu... Ma chì vuleti... Pezzi di i dischi dighjà isciuti, chì no' ùn rinighemu micca ma chì ùn s'assumiddani più tantu à ciò chì no' femu ( ùn sighi chè par via di u cambiamentu di cantadori... ) ùn saria unestu artisticamenti di sciaccà li quì. L'interpretazioni novi d'issi pezzi sò dighjà avviati, ma hè un travaddonu chì no' ci ricusemu à prisintà mezu finitu, par rispettu par vo'... I criazioni, par via di raghjoni di prutizzioni, ùn li pudemu prupona, è ci capisciareti, innanzi d'avè li dichjarati...
Allora, cù tutti issi custrinti, circhemu quantunqua à dà vi unipochi di nuvità è d'infurmazioni, da chì vo' sappiati chì no' asistimu sempri è chì a strada di u nosciu cantà, a lachemu aparta...
D'altrondi, par sazià à pena a curiusità di quiddi chì ci facini visita quì, vurriamu dì chì, da l'inguernu à a branata, unipochi di cuncerti i vi prupunaremu... Quissa hè robba sicura... Cuncerti in Corsica, bedda sicura !
À issu sughjettu dinò, qualchì pricisioni s'imponi, postu chì un certu "Ulysses Simpson Grant" ci dumandaia in u libru d'oru sè no faciami qualcosa, "au moins en Corse". Iè, o Ulì, in Corsica, ùn t'inchiità, faremu.
Hè d'altrondi da pudè fà qualcosa di campatoghju in Corsica chì no' 'emu ricusatu parichji affari al dilà di tanti mari. Chì vo' sappiati...
In prima, avemu ricusatu u "Madison Square Garden", chì Brunu ed eiu erami impignati da u ritornu in iscola, è chì i nosci elevi ci primuraiani di più chè u publicu americanu !
Avemu ricusatu dinò u stadiu di Wembley, par ùn fà offesa à a mimoria di Freddy Mercury : u cuncertu miticu di culà devi firmà u soiu !
Bercy è Zenith, n'avemu ricusatu ùn sò quantu, chì t'aviami a paura, vistu chì issi loca sò un pocu chjuchi, d'ùn pudè suddisfà tuttu u nosciu publicu !
Ma u più chì ci hà dillusu, hè d'ùn pudè andà in Kinshasa, à u "Stadiu di u 20 di maghju", locu storicu è miticu di a carriera di Mohamed Alì, chì no' cantemu... Culà, l'autorità t'aviani a paura di muvimenti di panicca maiò è ani annullitu tuttu contru à a noscia vulintà !
Eccu, issi pricisioni sò par tutti, ma supr'à tuttu par "Ulisses Simpson Grant", cugnomu elettronicu d'una parsona piena à mudistia, di sicuru. Eccu d'altrondi parchì issu bigliettu si chjama "Abraham Lincoln". Ùn dicia issu prisidenti, è dunqua omologu di Grant, u veru : "On peut tromper une partie du peuple tout le temps et tout le peuple une partie du temps, mais on ne peut pas tromper tout le peuple tout le temps".
Ma à veru, in Corsica, ind'è no', da quì à pocu, ci saremu !
Cù piaceri, vi salutu
DI RITORNU.
Le 14/10/2009 à 09:26Commentaires (0)Ajouter un commentaireDi ritornu dopu à unipochi di ghjorna di silenziu, vi salutu.
Vi ni seti avvisti sicuramenti chì, iss'ultimi tempa, ci era u muvimentu à nantu à u "libru d'oru". À quiddi chì li garbani l'usi antichi è a tradizioni, li si pudaria dì ch'idd'ani ritrovu quì una nova vistura di u "chjam'è rispondi".
Hè vera dinò chì, com'è tandu, ci si trova di tuttu in issa ghjustra : talentu, ma ancu strufati di pocu sensu, viziu, annarbamentu, irunia, addisperu, stizza, risa... Ùn manca chè a rima ! Rimarcheti ch'idda si pudaria ancu fà a dumanda à l'interna(u)ti : o zitè, a prossima volta, liticheti vi in rima !
Altru puntu d'issi "chjam'è rispondi" elettronichi : com'è no' l'emu pricisata à nantu à i pagini di u cusì dittu "libru d'oru", a publicazioni di i missaghja hè stata larga, fora di l'inghjulii, a parlaccera, a robba sputrita...
Spiremu d'ùn avè cuntrariatu à nimu publichendu tuttu : l'ughjittivu ùn hè mai di fà mali, ma di lacà circulà a parolla... Ùn dicini certi chì iss'affari hè razza di u principiu di a Dimucrazia, innò ?
È sin' chì nimu ùn si ciuffiighja, ancu puri virtualmenti, lacaremu fà...
Ultimu puntu, infini, d'issi "liti virbali", l'apartura culturali. L'aveti rimarcata, l'erudizioni di l'intirvinenti ? Pocu l'artisti mintuvati, da ghjustificà un pinsà ! À ringrazià vi à tutti pà issa finestra sbalasgiata, "ochji à l'infora"...
Masimu chì cusì, emu (ri)scupartu u biatissimu "Ringo", è u so "Corbu Neru"...
Mi ferma avali à avvià l'adattazioni : "Diti mi qual'hè quiddu corbu neru ?" ! Ma basta, tarroccu !
Alè, à veda ci, sè Diu voli...
VI RINGRAZIEMU
Le 07/10/2009 à 12:56Commentaires (0)Ajouter un commentaireUn salutu novu, dopu à unipochi di ghjorna di silenziu... Vi vurriami ringrazià à tutti pà i missaghja lacati quì è culà, à nantu à i pagini o u libru d'oru... U vosciu intaressu, a voscia simpatia, u vosciu sustegnu ci toccani monda. Ci scusareti s'iddu vi pari longu u tempu par veda unipochi di nuvità, supr'à tuttu in fatti di musica. Pudeti essa assicurati chì u travaddu si faci. È, à titulu parsunali, vurria dì chì a "squadra ghjuventù" di Novi mi stona sempri par via di a so dispunibilità a so simplicità è u so talentu. Pridichighja pà a so casa, mi diciareti. È pudariati ancu avè a raghjoni, ma u fattu si stà chì ghjeu i pensu à veru, issi cosi. Ùn hè micca solu una manera di cumunicà cù u fora, hè un custatu di u fà è di u sapè fà chì mi rallegra ind'è issi ghjovani.
Ni prufittaraghju d'altrondi par risponda à qualchì quistioni posta quì o culà à nantu à u situ : Novi oghji si cumponi di cinqui (5) parsoni. Fora di Larenzu, Francescu, Cristofanu, Brunu ed eiu ( Ceccè ), ùn ci hè nimu à issu ghjornu in u gruppu. Ci chjamemu Novi, semu Cinqui, è in Quattru è Trè Setti, vi diciaraghju chì u prughjettu hè Unu : fà campà u gruppu è sparta, cù voscu... In Dui parolli, incù voscu, semu Sei !!! Ah, iè... Aghju missu Ottu minuti pà fà u biglittinu !
Alè, à veda ci !
40000
Le 24/09/2009 à 20:49Commentaires (0)Ajouter un commentaireVi salutemu !
Dicu "vi", parchì, issa volta, è à nomu di i "cinqui NOVI" ( Vi ramentu : Laurent, Francescu, Christophe, Bruno è Ceccè. ), vi vurria ringrazià di i passaghji è visiti à nantu à u situ... ancu quand'idd'ùn si passa nudda, o pochi affari. Soca hè u mischiu d'una bedda fideltà è d'una sana curiosità. Tuttu ciò chì dà vita à un situ, in fatti !
Allora oghji, miriteti un picculu riassuntu di a statina passata : c'era un gruppu chì durmia à pena, è u so situ chì ùn avia, u tintu, più nudda à cuntà ! Eppuri, c'erani tanti cosi à fà. Allora u gruppu hà scuzzulatu i so panni vechji, è u situ hà ritrovu unipochi di cosi à dì... Par istrada, dui si sò persi... O spapersi... Ma quiddi chì sò fermi in u gruppu, u laziu di fà lu viaghjà l'aviani sempri. Chì firmaiani tanti cosi à dì...
Ed erati tanti à stà ci à senta... Prova si n'hè, a ripresa di i visiti - i vosci visiti - tutti i ghjorna à nantu à u situ.
Allora, par no', ma dinò è supr'à tuttu par vo', "simu sempre in viaghju"...
È postu chì vo' ci seti cusì fidi, circaremu à prupona vi, da quì à pocu, qualchì affari novu à fà vi senta...
Da quì à pocu... Un pocu di pacenzia...
Di cori, vi salutemu è ringraziemu.
À prestu !
PSICOSI...
Le 20/09/2009 à 14:54Commentaires (0)Ajouter un commentaireVi salutu
Mi scusareti par u silenziu d'issi ghjorna passati, ma m'hè tuccatu, ancu à mè, à rientra...
Fatta a ripresa, mi sò missu à pinsà à ciò ch'e' pudaria scriva di NOVU. Micca solamenti i biglittini d'issu librettu eletronicu, ma ancu puisii o canzoni. L'idei, certi volti, trecani à vena o ancu poni mancà : eccu la a disgrazia di u scrittori. È andeti à circà la, vo', a Musa quand'idda si piatta !
Di chì parlà, tandu ? A Corsica ? Si n'hè dittu tantu ! A guerra ? Si ni sarà dittu ancu di più !! A miseria ? Mi veni mali... A pulitica ? Ah innò ! Basta ! (Eppo', da quì à pocu, cù i campagni alitturali, i presi di parolla à issu sughjettu sarani cuntati !).
I me pochi litturi di u mumentu ùn mi dani tant'idei... Forsa u ghjurnali ? Oh, tinè... L'eti vista quidda di a tromba in Aiacciu, quidda chì hà fattu vulà un camiò arrusti-pullastru par aria ? Ritrattu in prima pagina di u Corse-Matin... Timpacci è timpurali di fin' d'istati, scurruttoni, scatarrati... Di quissi, à senta dì, ùn si n'era mai visti ! Dicu "a tromba", chì s'e' dicu "a turnata", certi risicani di creda ch'hè ora d'appiritivu... Trombi, dunqua, ind'è no', ùn si n'era vistu micca... Ohimè chì ancu u tempu scimisci... Dighjà chì no' t'avemu à parà ci di a grippa ditta "purcina" ! ( Annu dighjà, t'aviami l'epatita in u ficateddu...).... Ah iè, ma tandu, eccu lu, u me sughjettu di a scrittura : a paura ! Di u timpurali, di i malatii, di l'accidenti, di l'ortograffia sbagliata, di i migranti, di i gruppi cuncurrenti, di u fiascu, d'avè la troppu chjuca o troppu moda, di a morti, di a sala viota, di a pagina bianca, d'ùn avè i mani strapuliti... A paura, a pauraccia, quidda chì vi torci è fragna i minuci, a fobbia, a psicosi o ancu... I psicosi... Tuttu, oghji, duvaria essa lisciu, schiettu, biancu, dissappitu, lazzu, è vi ni passu... I psicosi dunqua, pudariani custituì un sughjettu novu par scrivacciulà a me prossima canzunetta... Iè ma... À rombu di parlà ni, a psicosi di a pagina bianca hà presu a suprana ind'è mè, è mi ritrovu à a fini d'issu scrittu com'è à u principiu...
Infini, m'avarà pirmissu di salutà vi un'altra volta, è hè sempri un piaceri !
À veda ci, sè Diu voli...
PANNI VECHJI, PANNI NOVI...
Le 13/09/2009 à 11:15Commentaires (1)Ajouter un commentaire
Vi salutu.
Era issu 12 di Sittembri in Bonifaziu, pà a manifestazioni di sulidarità urganizata da l'associu "Basta u focu". A manifestazioni fù, à veru, una riescita, è fù un piaceri par mè, in più di quissa, di ritruvà unipochi di cumpagni è amichi, nati o crisciuti in issa cità magnifica, chì fù d'altrondi quidda di Mamma, ciò chì spieca - in parti - a scrittura di "a vela bianca". Ancu par ùn essa ci tantu à spissu, Bonifaziu teni una piazza particulari in u me cori.
Hè cussì, tandu è chivi, ch'idda mi ghjunsi l'idea di u titulu di iss'articulettu. Parchì, mi diciareti ? Parchì m'hè stata posta - l'attualità faci legi, innò ? - a quistioni di "a morti" di NOVI !!! "Comu ? Allora, u gruppu hè finitu ? Vi seti spiccati ? Novi hè dighjà Vechju ? Chì ci hè statu ?"
Ùn la socu sè certi ani lasciatu creda è pinsà ( Intaressu ? Cattivezza ? Falsità ? Malintesu ? ) chì, dipoi a partenza di Ghjuvan'Carlu ( supr'à tuttu ; è di Grigoriu un pocu, pò ancu essa... ), u gruppu si firmaia cussì. A cosa, hè vera, saria stata faciuli, pinseti : un musicanti, un membru fundatori. Ci hè di chì dumandà si...
S'e' possu capì u quistiunamentu di u publicu, mi veni mali, quantunqua, à pinsà chì una certa ierarchia - implicita ? - doca cusì pocu valori à l'altri membri di u gruppu. Semu sempri dui fundatori à firmà ci "in casa" ( Brunu ed eiu ), è a "team ghjuventù" ( Francescu, Larenzu, Cristofanu ) t'hà tutta a so piazza - è ancu una piazza maiori - in u gruppu. È ni prufittu par ramintà - ancu sè certi voci volini fà creda u cuntrariu - chì quiddi chì sò isciuti è mossi, ani sceltu da par iddi d'andà si ni. Eccu...
In quantu à campà senza fundatori... In Corsica, semu quantunqua avvizzi : Canta hà campatu dopu à Poletti, A Filetta dopu à Frassati, I Chjami dopu à Fondacci...
È in altrù, ùn ni parlemu : Pink Floyd dopu à Syd Barrett ( è era meddu tandu ! ), Genesis dopu à Peter Gabriel, Iron Maiden senza Paul Di Anno, Deep Purple senza Rod Evans nè Nick Simper ( rimpiazzati, quisti, da i membri, fundatori micca ma mitichi di più, Ian Gillan è Roger Glover ), I Who dopu à Keith Moon ( Mortu, quiddu, u tintu... )
... È senza amuffà nè disprizzà à nimu, ùn pensu micca chì Ghuvan'Carlu è Grigoriu si poscani paragunà à Barrett, Gabriel, Di Anno, Evans è Simper, Moon....
Eccu, cù tuttu issu riassuntu, naziunali è internaziunali, ùn mi disturba mancu stampa di pinsà chì Novi, senza Papi, ( nè Gambarelli... ) sarà pà no' quant'è à lascià i panni vechji par metta i panni... NOVI !!!
Alè, à veda ci !!!
09 /09 / 09
Le 08/09/2009 à 22:38Commentaires (1)Ajouter un commentaireVi salutu...
Ci criditi, vo', à i simbuli ? Eiu, sì ! È casca bè : figureti vi ch'iddi sò novi volti ch'e' provu à scriva issu bigliettu è chì l'urdinatori ùn voli senta nudda... Novi volti ! Vi rindidi contu ? Parlendu di simbuli, mi veni à menti chì dumani ( ma quandì vo' lighjareti, sarà oghji ! ), sè ùn mi sbagliu, hè u Ghjornu di Novi. Iè, dumani hè u 9 ( Novi ) di Sittembri ( Novi ) di l'annu... 09 ( Novi, dinò ! ) !
Tè, mi faci pinsà à l'anziana scrittura di u nomu di u gruppu... Vi n'inviniti ? Iè, aiò... U famosissimu N-9-V-I... Puh, quissu, certi ùn lu sapiani mancu prununcià. Aghju ancu intesu - tiniti vi bè ! - " Enne - Neuf - Vé - i ". Hè vera chì par a prununcia, stroppiani quì, oh ! Masimu à nantu à l'ondi. Allora avemu à Noie, Noi, Nove, Neauvy .... Alè, o ghjenti, un picculu sforzu. A prununcia ghjusta, pà issa volta, a vi scrivu : NOWI !
Pà vulta ni à u ghjornu di NOVI, vi cuncedu ch'ùn socu eiu à essa mi ni ramintatu, puru scrivindu o circhendu à scrivacciulà cù singhi simbuli. Hè unu di i ghjovani membri di u gruppu chì a ci hà fatta rimarcà, fendu a prova di u so attaccamentu à l'andatura noscia è di u so sensu prufondu di u linguaghju simbolicu. Mi cunsularaghju dindu ch'iddu fù un elevu meiu, è, sè vo' pirmittiti : ti salutu cù rispettu è fratiddanza, o Francè !
Allora, chì fà par fistighjà di manera degna u Ghjornu di Novi ? A me pruposta ? Fà spezia di un Sabbatu ( à u senzu ebbreiu ! ), ma unicu : un ghornu induva l'umaghju saria u silenziu assulutu, l'assenza di gesti, di sforzi, di rimori... Un ghjornu di viotu cumplettu... Viramenti com'è un Sabbatu...
Chì beddu umaghju, innò ?
Hè par quissa chì u bigliettu, l'aghju scrittu l'Ottu...
Alè, à prestu, sè Diu voli...
"TUTTI L'ANNI DI SITTEMBRE...
Le 07/09/2009 à 10:23Commentaires (0)Ajouter un commentaireÈ vi salutu, un'altra volta... Di fatti, aghju pochi cosi da cuntà vi, inchjaccatu trà a riintruta ( Ch'e' duvaria fà da quì à pocu... ) è a Santa di u NIolu ( ùn ci socu micca andatu, issa volta... ).
Ma puri, par tena vi un pocu discitati à nantu à u filu di l'attualità, qualchissia m'hà mandatu un ritrattu d'un cantarinu / sunadori nustrali, persu trà dubbiti, successu, criazioni, publicu, (dis)urientazioni musicali, arti è dimagugia... U curciu ùn sà più chì fà...
Anc'assa', mi pari chì no'(vi !) cunnoschimi un pocu di più a noscia strada. Meddu, di tutta manera, chè issu disgraziatu, chì pari sempri circà a soia !
Alè, curaghju, o Maè... È à veda ci !
"QUÌ FINISCE LA CANZONA...
Le 05/09/2009 à 11:13Commentaires (0)Ajouter un commentaire...di li sumeri castrati !".
Bonghjornu.
Di quissa, a canzona, vi n'inviniti sicuramenti. Era, in i tempa biati di u Riacquistu, un "credu", quasgi un scrittu fundatori da spiicà un'andatura : u cantu purtaia l'identità, c'era oramai una rumpitura cù i "sirinati à turisti", è una critica, dura è diretta, era fatta à quiddi chì "runcaiani tutti l'istati par dui soldi in caffè".
Chì ni ferma oghji, d'issi pinsamenti è andaturi ? Senza fà vi una dissertazioni, un cuncistoriu filosofficu à nantu à issa tematica, vi dumandaraghju, simpliciamenti, d'avvinghja caffè, risturanti, camping... è d'apra un pocu i vosci arichji... È i sintareti tutti, i vosci "classichi" di u Sittanta o l'Uttanta : compañero, catena, i paisoli d'orezza, dui o trè canzoni inglesi, un pocu di francesu è... qualchì baiocca à u cantarinu in fin'di pranzu ( chì u più à spissu, u clienti manghja in u tempu ch'iddu canta l'artistu ! ).
Par essa unestu, mi tocca à dì ch'iddi sò cosi ch'anc'eiu aghju fattu : u soldu, s'idd'ùn hè arrubbatu in a bunetta di u disgraziatu, faci prò à tutti, ed hè vera ch'ugni travaddu a si mireta, a so paga... Ma unipochi di punta poni quantunqua disturbà, diranghjà, cuntrarià. Vali à dì chì :
- Sò à pena disturbatu - saraghju u solu ? - di veda fiuriscia principalmenti iss'attività sutt'à u soli di l'istati : l'inguernu, u so silenziu, a so cutrura, u so viotu, sarani un tarrenu sacru è cunsacratu à i Corsi soli ?
- Sò un pocu diranghjatu - ci ni sarà d'altri ? - di senta certi canzoni in certi circustanzi. O zitè, par piaceri, ùn canteti po' micca in issi situazioni iss'innu, un pocu sticchitu, chjamatu "I Sumeri Castrati", o a so versioni "funky", "Toumouloudounloucouchoun". ( Vi ghjurgu ch'e' l'aghju intesa fà da certi, iè ! )
- Sò piuttostu cuntrariatu - à tempu à qualchì preti ? - di veda com'idda si sparghji a pulifunia l'istati in i ghjesii. A sacra è a prufana. O lu bruttu mascacciu ch'e socu, mi diciareti... È parchì ùn si pudaria sparghja a noscia cultura pulifonica ?
Parchì, iss'ultimu puntu, mi pari ch'iddu posca ghjustificà tutti l'altri argumenti mei. Mi spiecu :
Di regula, ùn duvaria, nè pudaria, rimpruvarà à nimu di vincia si trè baiocchi cù u so talentu. Ùn hè una di i difinizioni di u travaddu, pudè prufittà, è vincia soldi, cù u so sapè fà ?
Ùn duvaria, nè pudaria mancu, rimpruvarà a pusizioni statinesca di l'animazioni : a sapeti com'è mè, i caffè è risturanti ùn poni viaghjà chè cù clienti, ed hè solu d'istati chì i clienti sò à bastanza numarosi da permetta à i cumircianti di pagà si un cantarinu o un picculu gruppu.
Ma in quantu à l'animazioni pulifonica, bilanciu radicali par contu meiu :
Micca sunurisazioni ad appruntà, spazii sacri pruposti di rigalu à cantarini chì facini pagà à intruta : ùn ci hè quì nisciun risicu presu, à liveddu suldarinu, chì posca spiicà u cunfinamentu statinescu di st'usu.
Di quissu po', u cantu, ni pudariani ancu binifizià i Corsi, in a cutrura, è u viotu, è u silenziu di l'inguernu. È puri ùn issendu ci chè vinti parsoni à volta, i cantarini si pudariani goda u prezzu pagatu par vinti piazzi, senza perda soldu, zicca o baiocca...
Allora, parchì tandu issu silenziu ( quasgi ) tutali ?
Mi dispiaci à dì la ma, soca chì à certi, ùn ci hè chè u soldu chì li và (...è micca pocu, o ! ), sacru o prufanu ch'iddu sighi...
Alè, à vedaci ( o avvedaci ! )
PARLENDU DI LINGUA...
Le 03/09/2009 à 19:46Commentaires (0)Ajouter un commentaireVi salutu dinò... Oghji, aghju asgiu - è tempu, diciarani certi ! - par impinnà !
L'avareti capita, lighjindu u titulu, ch'hè di Lingua Corsa ch'e' voddu parlà ( Aaah... Issi maiusculi chì rendini i cosi un pocu troppu sacri ! ). Micca a lingua di u cantu, a puisia o u scriva. È mancu quidda di u parlà d'ugni stunda. Innò, vi vurria parlà di a lingua di a scena, quand'iddu tocca à u cantarinu à prisintà è spiicà i so canzoni... Umbeh, pocu u sughjettu, mi diciareti...
Spiichemu ci dunqua. Ugnitantu, quandì vo' aprudeti u Corsu par sparghja in u publicu l'intinzioni supposta di quiddu chì scrissi, vi veni un moghju, da issu stessu publicu : "en français !". O ancu : "on comprend rien !". È parichji volti, u curciu cantarinu si senti ublicatu d'aprudà a lingua di Molière è Maître Capellò !
Nurmali, diciarani certi ( quiddi di u primu filari di u bigliettu ! ). Certi, u Corsu, ùn lu capiscini micca. È devi ancu essa vera, mirè !
Ma o ! Pinsendu ci, à i cantarini inglesi o americani - a socu, sò pochi, ma sò, quantunqua ! - chì affaccani quì colpu à colpu, li si dumanda d'abbandunà l'inglesu par spiicà si in francesu ? Pocu è micca, mi pari. Pocu è micca !
Ahè, chì vuleti, pari ch'iddu ci sighi una ierarchia in i lingui... A noscia devi essa in fin' di classifica !
Par contu meiu, circaraghju à fà com'idda mi veni, da Corsu à francesu, postu chì bislinguu socu.
Ma ghjustu com'idda mi veni, è micca com'iddi mi dicini di fà !
Alè, à u piaceri di ritruvà ci...
CHÌ CI HÈ DI NOV(I) ?
Le 03/09/2009 à 10:07Commentaires (0)Ajouter un commentaireUn salutu à tutti !
Spiccà si d'unipochi di i soi ùn hè mai cosa asatta, supr'à tuttu, quand'iddu si tratta di musica, quand'iddi sò ghjenti di valori... Ma cusì và a vita, è ugnunu ferma libaru è maestru di i so scelti...
Eppuri, a noscia strada ùn si ferma chivi, chì u laziu di cuntinuvà, d'avvinghja chjassi NOVI di musica è puisia, l'avemu sempri à cori ! Hè cusì ch'iddu si cuntinuvighja à travaddà, à pruvà, à visticà, circhendu, senza pratinsioni micca, à prupona vi u meddu di ciò chì no' sapemu fà... Cù l'inguernu chì s'affacca, ci primuraremu supr'à tuttu di prupona vi un spittaculu (ri)novu, è par dui raghjoni :
- ùn si pò frustà a pacienza di la ghjenti rimittindu sempri in scena i stessi pezzi
- ùn si pò cuntintà omu di una sola prisenza statinesca è lacà viotu è mortu u spaziu di a inguirnata.
... Di sicuru, quissi sò intinzioni, è u più difficiuli sarà di metta li in pratica. A ci pruvaremu pianamenti è bè, sapendu malgradu tuttu chì, innanzi d'accupà a scena, ci tocca à appruntà un travaddu maiori da muscià vi qualcosa di campatoghju, è di novu à veru. Chì in fin'di contu, ùn hè quissu unu di i sensi di u nosciu nomu ?
À prestu, sè Diu voli, è cù piaceri...
